E hika mā, kātahi nei te nui o ngā akunga e piki ana, e eke ana ki te tihi o te puhikaioreore! Ko Arini tētehi o ēnei kua whiwhia tētahi o ngā karahipi kia whakauta i a ia me āna nei mahi. He karahipi iti nei te toha atu, ā, mō te hunga matatau kē e hoa mā!
1. Ko te tuatahi nō hea koe?
Nō konei ahau, nō te Whanganui-a-Tara. He iti anō tēnei nō Mōtai-tangata-rau.
2. Katahi anō koe ka whiwhi i te karahipi Vice Chancellor? He aha tēnei karahipi?
He karahipi pai tēnei! I te tīmatanga o te tau ka tukua ētehi kaupapa tekau mā ono piki ake, heke iho rānei e te tari o te ahorangi o te whare wānanga nei. Mēna kei a koe tō tohu paerua ka taea e koe te tono atu mō tētehi o ēnei karahipi. Engari ahakoa tekau mā ono ngā kaupapa, tekau mā rua noa iho ngā karahipi nā reira kia āta whakarite tō tono.
3. He aha te kaupapa e whai ana koe? Whakamārama mai i pēhea koe i whai i te kaupapa nei?
Ki ahau nei he kaupapa nui, pai tonu hoki. Kua kōwhiria tētehi kaupapa e pā ana ki ngā tuhituhinga Māori o ngā tūpuna, o ngā tau kotahi mano waru rau. I tēnei wā kei te whakaaro ahau ka huri ahau ki ngā tuhinga o ngā wāhine Māori o ērā tau e noho ana ki Pōneke nei.
4. He aha te take e whai ana koe ki te mahi nei?
Kei te pīrangi ahau ki te whai i ngā tapuwae a kui mā, a koro mā arā, ko tōku tino hiahia ko te piki ake i te ara tukutuku o Poutama. Me te mea hoki he pai tēnei momo mahi mō ngā mea nohinohi o tōku whānau, mō te whānau whānui hoki. He mana tō te tuhinga o neherā, he mana hoki tō ia kaituhi. Mīharo kē ngā tuhinga o ngā tūpuna Māori o te motu nei ahakoa nō hea. Kei te pīrangi ahau ki te tuku atu i ēnei pukapuka hōhonu, ātaahua hoki ki te ao hurihuri nei, ki ngā whakatupuranga kei te heke mai nei.
5. He kupu whakakapi, whakatauki rānei mo te hunga e hiahia ki te whai atu i te ara e takahia ana e koe?
Whāia ōu moemoeā – mēnā kei te tuoho koe, me he maunga teitei – mahia te mahi kia oti!