Mai i taku tamarikitanga, i puta taku kaingākau ki te hāereere ki tāwāhi. Nā tōku kuia rāua ko tōku koroua au i hari i tō rāua taha, i ā rāua haerenga ki wīwī, ki wāwā. Taku waimarie hoki! Ahakoa taku pakupaku i taua wā, e hia nei ngā painga i whiwhi au i te tipiwhenua, arā, te tūtaki tāngata hou, te whakawhānaunga, me te ako i ngā momo ahurea ake o ngā whenua.
Nā wai rā ka pakeke haere au, ā, ko au me tōku kotahi tērā i whakawhiti i te ao kia tae atu ai ki te whenua o Itaria. I reira au e noho ana mō te tekau marama, mō tētahi whakawhitinga kura. Ahakoa aku haerenga ki te taha o tōku kuia me tōku koroua ki Ūropī, kāore mātou i haere ki reira. I kōwhiria taua whenua e au mō te ataahua o te reo, te hītori o te whenua, ngā mahi toi ngā mahi hoahoa, te kai, ngā tāriana Itariana (ktk) he aha atu, he aha atu.
I noho au ki te taha o tētahi whānau Itariana, ā, nā rātou au i tiaki, i manaaki. Kāti, ahakoa he poto noa iho taku wā i tō rātou taha, i whakauruhia au ki tō rātou whānau, anō nei he tuakana, he tuahine, he tamāhine au nā rātou tonu. E kore au e warewaretia tō rātou manaaki mai, ā ka noho whānau tonu mātou, ahakoa tō rātou tawhiti.
Ko te kaupapa matua o te haerenga he whakawhiti kura, ā, i haere au ki tētahi kura toi i reira. I te timatanga, kāore au i te paku mōhio ki te reo Ītariana, engari, nā wai rā, ka matatau ake au ki taua reo. He uaua hoki taua mahi i te marama tuatahi, nā te paku noa iho o ngā tāngata i mōhio ki te kōrero i te reo Pākehā. Heoi, i awhina ōku hoa, ā, tōku waimarie hoki nā te mea he rite te whakahua o te reo Itariana ki te reo Māori.
I tūtaki au ki ētahi atu tauira mai i whenua kē, pērā i a Āwherika ki te Tonga me Tiorangi. Kāore i roa, ka piri tahi mātou hei hoa. Ka noho hoa pūmau tonu mātou, ahakoa ka noho mātou ki tēnā pito, ki tēnā pito o te ao. I hāereere mātou ki ngā tāone tata ki a mātou, pērā i a Mīrāno, Wēneti, Roma me Whērona.
Ahakoa ngā piki me ngā heke, i taku haerenga ki Itaria e kore au e warewaretia ngā āhuatanga i kitea, i rangona. Ka noho hoki ēnei wheako hei whakahāngai i ōku whakaaro, me ōku mahi mātauranga. Ki te tipiwhenua koe, he mea whakatūwhera i tō ao, kia rere whānui ai ō whakaaro. E kore rawa tēnei tū-āhuatanga e wātea mō ake tonu atu, nā, me whai i ā koe e pūhou nei. Nā, he nui noa atu ngā huarahi, ngā wheako ka whāia e koe mai i te tipihaere.
Nā ko te tipiwhenua, tētahi o ngā ‘māramatanga’ o tōku ao. Āe, ko te whānau tētahi, ko ōku hoa tētahi anō hoki. Heoi, e hia kē nei ngā whetū e tiaho ana i tō tātou nei ao?
Kupu Hou:
Whakawhitinga kura – School Exchange
Tipi whenua – Travel
Pūhou – Young