A ha Te Arawa e!
A ha Te Arawa e!
Ko te whakaariki. Ko te whakaariki!
Tukua mai ki a piri, tukua mai ki a tata
Kia eke mai, i runga ki te paepae poto a Houmaitawhiti!
Te Arawa tangata, Te Arawa waka! Nā rātou te reta pōhiri ki te motu whānui kia ū mai ki runga i te paepae poto a Houmaitawhiti. I tae mai te tini me te manō ki Rotorua i runga i te karanga o Tane Rore, o Hinerehia. Whā tekau mā tahi ngā kapa i tae atu ki te mura o te ahi mai Te Hiku o te Ika, te puku o te whenua, te pane o te motu, whakawhiti atu ki Te Waipounamu, ā, peka atu ki te Pāpaka a Māui hoki.
Whiti mai ana ngā hīhī o Tama nui te rā mai te 20 ki te 24 o Hui-tanguru 2013. Heke ana te werawera i te papa tuwaewae mai ngā puna o Te ihu, Te Haumi, Te Kei, ā, me Te Whakarae i te rātapu. He huihuinga tangata i runga i te rangatiratanga o te kapa haka “ki te whāngai, ki te whakatipu, ki te manaaki, i ngā mahi kapa haka kia puawai ki ōna taumata”.
Me mihi ka tika ki ngā roopu, ki ngā kaihaka hoki i tū ki te Matatini 2013 ki te kite ko wai te tihi o te maunga o te Kapa Haka. Heoi i te mutunga iho ko Te Toa Whakaihuwaka ko Te Waka Huia, ka rua ko Te Whānau a Apanui, ka toru ngā roopu e toru ko Whāngārā Mai Tawhiti, Tū Te Manawa Maurea me Te Iti Kahurangi.
E kore ngā mihi e ngū mō te manaakitanga o ngā pūmanawa e waru o Te Arawa!
Ka tū te Ma tatini ki Te Waipounamu i te tau 2015.