Nā Io i tuku te wairua ki te ao, ki te pō, ki te ao, ki te pō. He wairua ka rere, he wairua ka tau e, he wairua tā te tangata e, he ira tangata e. Ko te wai o te ira tāne me te wai o te ira wāhine, ka puta mai te kura tangata. He mauri, he tapu, he mana he tāonga tuku iho e. He mamae aroha, he ngākau nui rawa ka pūawaitia. Mai i tana tamarikitanga, ki tana rangatahitanga, ki te tino rāngatiratanga. He mauri, he tapu, he mana, he tāonga tuku iho e.
Tēnā koutou katoa,
Ko Jacqualene Poutu ahau, he uri ahau nō Te Aitanga ā Hauiti, nō Ngāti Hau o te Tai Rāwhiti tae noa atu ki Ngāti Te Ata o te Tai Hauāuru. Ka tirohia tāwhiti ki Titirangi, ki Hikurangi, ki Taupiri me ō rātou mana rangatira, tau kaha mai rā. Ka huri au ki te mana o te hau kāinga me ngā mātāwaka katoa kua tautahi mai nei. Ka ahu mai i te rohe nei i ngā hihi ātaahua o Tama-nui-te-rā me te kaha pūpuhi o Tāwhiri, arā, ka piritahi ki te reo rangatira o te mana whenua.
Ko wai a Te Mana ākonga?
He reo māngai tēnei mō koutou ngā tauira Māori ki roto i ngā Whare Wānanga me ngā Kura Tini puta noa o te motu. Nō Te Mana ākonga (TMA) ahau. He reo tauira Māori mātou nō TMA ki roto i tō Whare Wānanga, ā, ka kōrerotia hoki ki roto i Paremata mōu. Ka mihi atu ki te rōpū o Ngāi Tauira (NT) o te Whare Wānanga nei. Ko ētahi o koutou e tū māngai ana kia whakatakotohia i te reo karere o te iwi Māori, arā, ka whakamanatia i tō ake reo, ko te reo motuhake o te tauira. Huri noa ki ngā kaimahi, ngā whānau i tautoko mai, me ērā o koutou i whiwhi tohu ana. Whaia mai i ngā tapuwae o tātou tipuna, whaia atu i ngā kete o te wānanga. Whāngai atu tōu reo mātauranga kia whakapakari, kia whakamanatia i ngā whānau i ngā hapū me ngā iwi. Mauri ora.
Anei ētahi kaupapa ki roto i Paremata i whaia atu mātou o TMA. Ko te tuatahi, ko te reo tauira Māori, te reo rangatira mō mātou. Tuarua, ka āta tirohia mātou ki ērā karere tohutohu rānei ki roto i Paremata, arā, ka whaia atu, ka rapu, ka tū māngai mō tātou ngā tauira Māori i whai mātauranga me te iwi Māori hoki.
Manaaki Tauira
He tūmomo kaiārahi mātou mō te whakahoki mai a Manaaki Tauira kia tautoko mai i ngā ākonga Māori. Kua tau te karere mai i te Pāti Māori ki Paremata mā TMA kia whakaritea i ētahi whakaaro kia hangaia i ngā ture me ngā tohutohu hou mō Manaaki Tauira. I te wā ka tuku mai a Manaaki Tauira anō, he wā whakahirahira mō tātou te iwi Māori. I ēnei rā ka kitea te tino pōharatanga tae noa te motu ahakoa he Māori, he Pākehā rānei. He paku noa iho ngā raru mō te nuinga ēngari, mō tātou te iwi Māori tino rerekē ngā taumahatanga. He aha te utu mō ngā whānau i te kāinga – ngā ahi kā? He āwangawanga tūturu tērā nā te kore mahi, nā te kore whai mātauranga, nā te hauora o tātou. Ka mataku mai i ētahi nō ngā tinihanga o te kāwanatanga. Heoi anō, he aha ngā whakaaro kua puta ā ngā tauira Māori?
Ki a mātou o TMA ka whakaaea kia tuku pūtea hei tiakina ā tātou tamariki ki roto i ngā Kohanga Reo me ngā Kura Kaupapa/Kura Tuatahi, kia whakapakari te hunga rangatahi o ngā Kura Tuarua/Wharekura, kia tautoko mai i ngā ākonga Māori ki ngā Whare Wānanga Māori, Whare Wānanga Tauiwi, Kura Tini, Kura Takiura. Kua whakarite he kaupapa hei Manaaki i ngā Tauira Māori katoa. Mēnā he whakaaro tāu, me īmēra ērā ki a au: email.
Te Takutai Moana
E whakaae ana mātou kia hangaia he ture kāwana anō nā te kūwaretanga, nā te whati kawa, nā te paruparu me te matenga o te ao Tangaroa. Ko te tino tūmanako kia mahi tahi te kāwana i te taha o ngā tāngata whenua. Ki te kore mātou te iwi Māori i whai reo i runga i ēnei momo kaupapa e te kāwanatanga – tēnā pea ka whati anō, ka kūware anō rātou, ka tīmata anō tātou. Me tiaki te takutai moana hei tāonga mō ngā whakatipuranga.
Koinā noa iho ngā hua o TMA kua puta mai i tēnei wā. Mēnā he pātai āu, tēnā īmēra mai. Mēnā kei te hia āwhina, tautoko hoki koe, tēnā kōrero tahi mai ki a mātou o TMA, ki ngā āpiha o Ngāi Tauira rānei. Mā mātou koe e awhi, e manaaki. He mihi maioha tēnei ki a Ngāi Tauira. He mihi maioha ki tō tātou Tumuaki Tuarua o te Mātauranga ātaahua, a Pania Lee mō tō kaha hāpai i te wiki o te reo!
Kia koutou mā, kia tau te rangimārie, kia māia, kia pūawai
Nāu te Mātauranga, nāu te Ao!
Nā Jacqualene Poutu
Tumuaki
Te Mana Ākonga
email
Level 3, 354 Lambton Quay
Pōneke