He tika rā te kōrero mate kāinga tahi, ora kāinga rua. Kua tipu tēnei mea te whānau Māori ki waenganui i ngā mokopuna mai ngā tōpito katoa o te motu kua uru ki raro i ngā manaakitanga o te tūpuna Pākeha a Wīremu Weir. Ko mātou kei te manaaki i a mātou anō. Ko te tūmanako, kia piki ai mātou ki ngā karamatamata o te ao mātauranga, kia kai i ngā kai whakairō o te rangi. He maha ngā mahi kua tutukia e mātou, he maha ngā mānuka kua hikina e mātou, he maha ngā tāngata hoki, kua mihia e mātou.
I tēnei wā, me huri ka tika ki te tirotiro i wētehi o ngā kaupapa, i wētehi o ngā mahi kua mahia e mātou.
Anō nei te weriweri o ngā pona o ngā tauira hou i to rātou ūtanga ki Pōneke. Ka rere te reo pōhiri ki ngā mātāwaka katoa o te motu, kia tau me o rātou tamariki mokopuna ki te whare e kīa nei, ko te whare ō Weir. Kātahi ka peka atu ki te Tumu Herenga Waka, mo te pōhiri o te Whare Wānanga. Kātahi te hōnore ko tēnei, kia noho ngātahi me wētehi mana nui o te ao Māori ki raro i te whakaaro kotahi: ki te whakanui i ngā tipuranga hou o te whare wānanga o te Ūpoko o te Ika. I runga i tērā, kua tangata whenua ngā tauira hou ki tō rātou kura hou me tō rātou kāinga hou. Ka tīmata ngā mahi!
Kei whea mai te ihi me te wehi o ngā tauira i whakatutū ai i te puehu, i a rātou e purei ana i ngā kēmu whakatau o Weir. I tukua e Ngāi Tauira i tētehi tono ki a Weir, kia haere ki tētehi pō whakangahau mō ngā tauira Māori hou o Weir me te whare whānau. Paihere te aroha, paihere te mana o ngā tauira i whakakotahi ai i runga i te karanga o ngā tuākana ki ngā teina. Anō te pai, anō te āhua reka, te noho tahi a te teina me te tuakana. Nā ka kite ngā tauira hou i ngā pakeke Māori o te Whare Wānanga, kia tipu ko te whakawhanaungatanga ki waenganui i a rātou, kia noho ai te kī, ko tāku toa, he toa takitini. Koinei ngā kupu ka rangona e ngā pakitara o te whare ō Wīremu Weir. Ka noho pātata wēnei kupu ki ngā ngākau o ngā tauira Māori e noho pū ki raro i te maru o te whare ō Weir.
Heoi, ehara te noho ki Weir i te mahi māmā. Kua kī katoa te whare i ngā āhuatanga Pākehā. Ko te uauatanga, ko te noho a te Māori ki roto i te ao a te Pākehā. Heoi anō, kua parea aua āhuatanga uaua ki rāhaki, kua tūngia te ururoa, kua mau ngā ringa ki ngā rākau a te Pākehā, ā, kua tīmata te tipu whakaritorito o mātou ngā tauira Māori ki Weir.
Me kī pēnei, kua hono te wairua, kua hono te tinana, kua hono hoki te wairua o te tangata ki tēnei whare. Kua noho a Weir ināianei hei whare whakaruruhau, hei pātaka kōrero, hei tāhuhu hoki mō ō mātou mahi ki te Whare Wānanga. Nei rā, kua tīmata te kai i ngā kai mārō. He kaitautoko a Weir i a mātou mahi i konei ki te Whare Wānanga. He pai te aki aki, poipoi i a mātou, kia eke ai mātou ki ngā taumata e hiahia ana.
Nō reira, ahakoa kei Weir mātou e noho ana, he Māori tonu mātou! Kāore anō mātou kia riro hai kai ma te taniwha wetiweti e kīa nei ko Pākeha. He Māori te toto, ā, he Māori tonu ngā whakaaro. Kei te noho tonu mātou ki runga i ngā kupu hā kui, hā koro. Ko mātou tēnei, ngā purapura tea e tipu ana ki raro i te maru o te tūpuna Pākehā a Wīremu Weir. Ahakoa te tūmatakuru me te tara ongaonga, ko mātou tonu e whai ana i ō mātou iti kahurangi. Ahakoa kei Weir mātou e noho ana, he tika rā te kōrero, he Māori tonu mātou, ā, waiho ki reira!