“Kei te tōpito o te ao e noho ana tētahi koroua me tōna hoiho, a Sydney Bridge Upside Down. He nawe te mata o te koroua, he hōtoa te haere a tōna hoiho. Nā, ka timata te kōrero ki te koroua me tana hoiho nā te mea i kitea ai ngā mahi kino i taua wā raumati.” (He wāhanga o te pukapuka)
Ka pēnei te āhua o tēnei whakaari. He pōuri, he pōtango.
I ahu mai te kōrero i te pukapuka Sydney Bridge Upside Down nā David Ballentyne. I tuhia te pukapuka i te tau 1968 engari ehara te kōrero i tētahi kōrero rongonui nō Aotearoa. Nā James Ashcroft o te kamupene whakaari, Takirua, te kōrero i whakawhiti ki te taumata o te ao whakaari.
Nā ngā whakaaro o tētahi tama tēnei kōrero. E whakaatu ana te kōrero i te āhua o tana hinengaro anō nei he matapihi ki ana kare-āroto. E noho ana te tama ki te taha o tōna matua rāua ko tana teina ki Calliope Bay. Kei taua tāone he wheketori patu kararehe i waihotia hei whare whakahapa. Kei taua whare ngā kōrero muna o te tāone, ngā mahi tūkino o te tama.
He tino pai te whakaputanga me ngā pūkenga o ngā kaiwhakaari. I te āhua o te pukapuka he ngāwari ngā kupu engari he hohonu ngā whakaaro. Heoi, he mahinga auaha te whakaari nō reira he nui ngā momo mahi hei whakaaturanga mā te kaimātaki. E whakamahia ana te mahi kōpuratanga, he waiata, he kanikani, he mahi whakakata i te tangata, he mahi whakamataku i te tangata, he aha atu. He kaha ngā kaiwhakaari ki te whakaatu i te āhua o te wā me te wāhi.
Ehara i te mea mā te hunga Aotearoa anake tēnei whakaari. Ka mārama ai ngā kaupapa o te kōrero ahakoa kāore te kaimātaki e tino kapo i ngā tikanga o ētahi wāhanga. Ehara tēnei whakaari i te whakaari pai mā ngā tamariki. He kirikau te tangata i ētahi wāhanga, e pōkē ana ētahi o ngā kaupapa. Kua kātia te whakaari i Pōneke engari ka whakatū anō ki Tāmaki hei te rā 7 ki te rā 11 o Ākuhata. He rerekē hoki tēnei whakaari i ētahi atu o Takirua. Heoi, he nui ngā whakaari o Takirua e whakaata ana ki Pōneke. He kamupene whakaari Māori rātou e whakaata ana i ngā kōrero o te iwi. Kei tā rātou pae tukutuku ngā mahinga o te kamupene.