I tēra tau, I whakamōhio atu tō mātou poutoko a Moana Jackson i te āhua o tō mātou whare whakaruruhau e kiia nei ko Ngā Rangahautira. I tapaina ko taua ingoa hei marae mo te hunga Māori e noho wehe ana i o rātou kainga maha, kia poipoia e te mahana o ngā pakitara me te hunga Māori o roto. E mau tonu nei te roopū o Ngā rangahautira i te kaupapa hāpai i ngā tauira Māori e takahi ana i te ara maro o te ture.
Nō te timatanga o te tau, kua ūpoko pakaru te komiti whakahaere o Ngā Rangahautira kia whakarite kaupapa nui mō ngā tauira Māori o te ture. Hei tīmatanga, I whakarite wananga te roopu nei mō ngā tauira pīpī paopao Māori o te kura tātai ture hei akiaki ia rātou i mua i tō rātou whakamatautau tuatahi. Kātahi te wānanga ko tēra! Muri tata mai i te whakamatautau, nā mātou anō i whakaritea i tētahi pō whakangahau hei whakarerea i ngā pēhitanga o te wā.
Nōnatata nei, i tū tētahi pakanga nui ki runga i te papatakaro ki waenga i a Ngā rangahautira me Ngāi tauira. He rangi whakaohooho i te tinana, whakawhānaungatanga anō hoki ki waenga i ngā tauira o Pipitea me Kelburn. Māku katoa te papa i te werawera e heke mai ana i ngā tukerae o te hunga heoi i te mutunga, mā te hākari kai me te kanikani o te pō tātou katoa e mauri tau i taua kaupapa.
Mā te kōrero anō tātou e matau ki ngā mahi o te ture, e āta wetewete i ngā kaupapa o tēra. Nā Kiritapu Allan te mahi nui ki te whakarite i ētahi kaupapa kōrero e hangai ana ki ngā mahi o te ture e whai pānga ana ki te Māori. I te haurua tuatahi o te tau I tau mai te roopu o Māori Legal Services ki te whakawhiti kōrero e pā ana ki ngā mahi e whakarite nei e rātou. Kua whai reo hoki te roopū nei i roto i ngā whakatakotoranga mo te pire takutai Moana. I roto i te whakatakotoranga, i whakaraupapa mātou i te tūnga o te tauira Māori e ako ana i te ture me ngā taumaha ka pēhi i te tauira ina ka ora tonu tēnei pīre.
Engari, kāore anō te tau ka oti, ā, he maha tonu ngā kaupapa kei mua i te roopu. Hei te marama Mahuru ka haere te roopu nei ki te hunga Roia Māori o Aotearoa ki te whakarongo, kia whai ranga wairua i ngā kōrero o te hunga Māori kei roto i tēnei mahi. Anō nei, i te mutunga o te tau, ka tū he kaupapa nui whakaharahara mō te roopū nei. He pō tuku kōrero e pā ana ki ngā ahuatanga o te ture mo te Māori.
Koia nei mātou e mau tonu ana ki tēnei kaupapa, te hāpai i te ture. A, ko te tūmanako, ka hau mai ngā tauira Māori katoa ki tō mātou roopu. Mēna he pātai tā koutou, tēna tuku karere mai ki: vuw_nr@myvuw.ac.nz.
Mauriora!