Oruoru te moana
Pupuhi ko te hau mātao
E nguha te mata, e mātaki kau ana ki te ākau tō rā
E pupū ake ana, e pupū ake ana ngā kare ā-roto inā kitea ai te kōraha o Papatūānuku ki te hau kāinga. Kei te pūtake o te maunga tītōhea o Taranaki tērā. Ko Ngāti Tamaahuroa, ko Titahi ērā, kei te rohe o Ngāruahine, Ko Oeo te manga, me te pā i waihotia ai e ngā mātua tūpuna.
E hia kē ngā rau tau, ngā ngahuru tau kua moremore te whenua, kua takahia rawatia e te kōpae tāngata me āna nekenekehanga, e te kāhui kau, me āna nukunukuhanga? He painga kua puta? Mō ētehi – he whenua, he kai, he pūtea, he oranga.
Kua pēhea koe e te ūkaipō, Papatuputupuwhenua? Kua pēhea koe Ranginui – ōu roimata aroha anahe e uhina ana tō whaiāīpō, i te hurahanga o tōna kākahu. Kua marara ngā uri whakatipu, ngā mokopuna ki te ao. E kawea ana rātou e nga hau pihi, e nga hau marangai anō nei he kākano…he kākano, he purapura, he tupu i whakarerea atu ai i te kāinga…
Tōtara, i tanumia koe i hea?
Kua whakatakotohia koe ki hea, Mānuka? Kua pau rawa koe i a Mahuika?
Tō ai koe i hea, ngāuteute? Me koe, Moemoe?
Nō wai te tatua i haria atu ai koe, kūmara?
Nei rā te mihi ki a koe Ahumairangi, ki a koutou ko ngā maunga whakahī, ko ngā toka tū tapu rā, ko ngā pae tū mātotorutanga tangata mai, huri noa, huri noa. Tū tonu rā koutou hei maru, hei tauranga mō ngā kākano, mō ngā uri o ngā mātā waka.
Areare te taringa, wherawhera te ngākau ki te waimanawa ā te kāhui kahika o ngā rā ki tua. Ka kapohia ngā nui e iri ana ki te pātaka o te kupu, kei ngā whare kōrero o te motu. Ko Tāne Whakapiripiri tērā. ko Te Tumu Herenga Waka tērā. Ko Tipuahororangi, ko Tipuahoronuku ērā. Ko te whare o Rongo hoki tērā. Kua rongo i te kōingo kia hoki whakateuru, ki te whenua tupuna, ki te whenua tupu.
Kua kotahi me te haurua tau i te whakatōtanga o Ngā Purapura, arā, o te Kaupapa Taiao ki te marae o Oeo. He akoranga, he māramatanga, he hua kua puta.
Ka mihia ngā pahake, ngā Tarati me ngā whānau o Oeo e tautoko ana i te kaupapa. Ka riro ma ngā pou tūturu o Ngā Purapura, mā ngā ringaringa me ngā waewae, te mahi mutunga kore e mahi! Kia pua, kia hua he oranga mō te iti, te rahi.
Nā Hugh Cargill rāua ko Sally Hīkaka ngā whakaahua nei i hopu.