Nō te uho o te ngahere i wehe atu te mata o Mumuwhango
tōna mana whenua i muri tonu i a ia.
Auē te kaha o te karanga i pā katoa ai i a ia,
pō iho, ao ake. Tē taea te wareware.
Ahakoa tonu, te pora hoki o tōna kite whakamua.
He wātea wīti e takoto noa atu ana,
ngoikore katoa te tū, āna, kai a Tāwhirimātea te rangatiratanga.
“Kai hea ngā tamariki a Tāne? Kai hea ōku hoa piritahi?”
Kāore anō te mokemoke e pā ana ki a ia,
wiriwiri kau ana te wairua,
he waipuke kai ōna kamo,
tōna kī whakamutunga,
“e noho rā taku whenua.”
I haere tōtika ia,
tae noa ki te ngaro o tōna whare koroua.
Kai tua rawa he wāhi mōna, kua mōhio.
Warea kē ia e te karanga e tōia atu nei
kia kohia, kia kaingia ngā hua ō ngā rākau rerekē;
kia pātaka tōna oranga.
Nawai rā, nāwai rā, ā,
kāore tonu ia e rongo ana i a Tāne
kai tata ia, kai wīwī, kai wāwā rānei, ko wai ka mōhio?
Ko Tāwhirimatea anahe ka kite.
He mamae tō tōna tinana, nā
ki te poho o te wātea e noho ana.
Kātahi, pā katoa anō taua karanga ki a ia.
Hunaia e te awhi o te witi, huri whakararo tōna rae hongi ai i te whenua.
Noho tahi mai rātau ko Papa ko Tāne,
kia kitea ai ngā pū o Tāne i raro i te wātea
nō tōna mana whenua,
ki te wāhi e tū ana ia,
ki te ngahere kai korā.
I muri tata tonu mai
kotahi tonu tana ki mua.
Ahakoa rā tē kitea te ngahere kai tua atu
ko nāia tonu e mahara ana ia
nō raro tonu te mana.