He mea whakatipu a Pimia Wehi e tōna whānau ki te riu o Te Aitanga-ā-Māhaki, ki te whaitua iti o Waihīrere.
Ko Ahitītī te maunga
Ko Te Waihirere te awa
Ko Ngāti Kōhuru me Ngāti Wāhia ngā hapū
Ko Te Aitanga-ā-Mahaki te iwi
Kotokoto ana a waikamo
Mātahetahe ana a hāne
Mōhou rā te mūrau o te tini, te wenerau o te mano
Haere, okioki atu ki ō heinga
E tomo rā ki Mirumiru-te-pō
E te Māreikura, te Ariki Tapairu o Māhaki e
Otirā he pānga anō ōna ki ngā iwi o Rongowhakaata, o te Whakatohea me Te Whānau-a- Apanui.
I a ia e tamariki ana, he waiata te mahi, nā whai anō i rāngona te wainene, te waitī o te reo waiata
i takea mai i tōna kāhui whakapapa me te mea anō he momo tonu tērā o ōna mātua tīpuna.
I tōna oranga he huhua noa nga tohu whakahōnore i whiwhi i a ia. Ko te QSM, ko te tohu kairangi hōnore mai i Te Kunenga ki Pūrehuroa, me ngā whakahōnore a tōna iwi Māori ētahi.
Ko tōna e tino koingo ana ko ngā mahi a te Rēhia, ko tōna oranga ko te haka. Ā, ko ia tonu tērā, ao noa te pō, pō noa te ao e whakapeto ngoi ana, e whakatangetange riaka ana ki ngā mahi o te whare karioi, tae noa atu ki tōna kaponga e te ringa o Aituā.
Nō te wehenga atu o Wiremu Kerekere ki te Whanganui-a-Tara, ka riro mā Pimia rāua ko Ngāpō te mana whakahaere o te kapa haka o Waihīrere, ā, i kawea e rāua taua kapa ki ngā papa tauwhāinga o te motu i te tau 1972 me te tau 1979. Nā wai, ka hūnuku rātou ko tōna whānau ki Tāmakimakaurau ki reira tīmata ai te kapa haka o te Waka Huia. I raro tonu i tō Pīmia me Ngāpō whakahaere kua riro te roopu nei i te tūnga whakaihuwaka mō Te Matatini i ngā tau 1986, 1992, 1994 me te 2009.
Nā Ruth Smith