Hei te 26 o Whiringa-a-Rangi 2011 ka tū te kōwhiringa pōti mō te motu. Ko tēnei te wā mō tātou kātoa ki te whiriwhiri i te hunga hei ārahi i to tātou whenua o Aotearoa mō ngā tau e toru kei mua i a tātou.
Mena kāore anō koe kia whakauru i tō ingoa ki te Kōmihana Kōwhiringa, kātahi anō koe kia eke ki te tau 18 rānei, whakapā atu ki to rātou wharangi ipurangi ki reira whakauru i tō ingoa, ā, ki reira anō ka whiriwhiri koe mō te rēhita Māori, mō te rēhita auraki rānei. He tikanga ā ture tēnei o te whenua o Aotearoa kia whakauru te tangata pakeke ake i te 18 ngā tau.
E hia nei ngā roopu tōrangapū e kimi ana i tō pōtitanga i tēnei tau, arā, ko ngā mea kaitā nei, rongonui anō hoki, pēnei i a Nāhinara, Reipa, Kākāriki, Māori, ACT, Mana, Aotearoa Tuatahi. Ēngari e maha kē atu ngā roopu iti, pēnei i a United Future, a Aotearoa Legalise Cannabis, Libertarianz, OURNZ. Kei te wharangi ipurangi o te Kōmihana Kōwhiringa (Electoral Commission) te katoa o ngā roopu tōrangapū. Kei ia o ēnei roopu ngā momo kaupapa ka pāngia ki ngā āhuatanga katoa ō tātou ao. Te Ao Māori, te ao Tauira, te ao noho whare, te utu penihana, ngā take Tiriti aha atu aha atu.
Kei ia o ngā roopu tōrangapū ō rātou ake whārangi ipurangi, whakapā atu ki ēnei pae tukutuku mō te roanga o o rātou kaupapa, ā ki te mōhio anō ki ngā kaiwhakataetae o ia roopu anō hoki. Ko te tūtohutanga ki a koutou, kimihia i ngā kaupapa e kaingākau ana e koe, ā tirohia ko tēwhea o ngā roopu tōrangapū e whakaaro tahi ana kia koe.
He mea mīharo te kōwhiringa o te tau 2011 i te mea ka tū anō tētahi aronga ā iwi (referendum) mō te āhua o ngā kōwhiringa i ngā tau kei te eke mai. Ko te pātai matua o te aronga ā iwi nei, e kite ana mena e kaingākau ana te motu ki te MMP, e hiahia ranei ki te whakarerekē ki tikanga kē.
I te mea anō ka tū te kōwhiringa nei a muri i te mutunga o te tau o te whare wānanga, ākene pea ka wehe atu ētahi o tātou ki tāwāhi hararei ai, ā, ka hoki ki o mātou ake wā kainga, ēngari kei te pai, ka taea te tuku pōti motuhake i mua i to wehenga ki wāhi kē rānei.
He whakamōhiotanga anō ki te hunga kāore anō kia tuku pōti i mua, e rua ngā pōti kei ia o tātou, kotahi mō te tangata, te tuarua, te mea matua anō hoki ka tuku mō te roopu. Ka taea te wāwahi i aua pōti e rua, arā, ka taea e koe te whiriwhiri i tētahi kaiwhakataetae mai i tētahi roopu, ā, ka tuku pōti mō tētahi atu roopu mena kei te pīrangi. Ko te pōti-ā-roopu te mea hei whiriwhiri i te kāwanatanga mō ngā tau e toru e whai ake. Kei a koe te tikanga mō o whiriwhiringa, nō reira kaua e māharahara mena e maumau wā noa iho te pōti mō tētahi roopu iti, engari me pōti ka tika. Ka noho koe, kei mahue to roopu tautoko ki waho makariri ai.
Mō te roanga o ngā whakamarama, ki te whakauru i tō ingoa ki te Komihana Kōwhiringa, whakapā atu ki te wharangi ipurangi www.elections.org.nz. Kaua e wareware, he mīharo te kāwanatanga-ā-iwi (democracy), he tikanga hirahira anō te tuku pōti, whakamahia. Mānuka takoto, hikina, kawea, whakatau!
Nā James Perry