I tū te whakaaturanga o te rōpū ReGeneration i tera wiki ki Te Whare o Ngā Tino Mahi Toi, ara, te Academy of Fine Arts.
He pikitia, he whakaahua, he tuhituhi, he mahi whakairo, he tūru hoki ētahi o ngā mea e iri ki ngā pakitara, e tu ana hoki ki te whare toi. He kohikohinga toi ēnei mai i te haerenga a ētahi kaimahi tekau o te rōpū ReGeneration. E tekau mā rima ngā wiki i a rātou ki te tipi haere ki ngā tōpito o Aotearoa ki te whakanui i ngā kaupapa taiao ki ngā kura auraki, kura tuarua.
I au e tirotiro haere ana ki ngā whakaahua, ka puta mai te whakaaro ‘he haerenga whakanui i te hononga o te tangata ki te whenua kē tēnei’ me te mea hoki ko ngā whakaahua e whakaatu ana i ētahi o ngā wāhi papai rawa atu o Aotearoa, anō nei he wāhi e noho ai te tangata.
Ko ngā tuhituhinga ki ngā pakitara e pā ana ki ngā wawata a ētahi mō to rātou ao, mō te taiao hoki, ka mutu, he mea whakanui i te tangata ēnei kupu a rātou e whai whakaaro nui ana ki te ao. Kei tētahi wahanga o te whakaaturanga he kiriata o ētahi o ēnei tangata e whakapuaki ana i o rātou whakaaro, e whakaatu ana i o rātou mahi hoki.
He whakaaturanga rawe tēnei mō te taiohi, mō te rangatahi e hiahia te kite i ngā mahi manaaki whenua a ētahi atu o Aotearoa. He pai hei kite atu, kia mōhio ai te tangata, ehara ko ia anake e toko ana i tēnei kaupapa.
Nā PĪwaiwaka o te KĀhui Manu