I ēnei rā, te āhua nei ko te mea nui e raru ana i a tātou ngā tamariki a Tāne ko tēnei mea e kī ana ko te “Whakamahana o te Ao”. Inaiānei ka tautoko te nuinga o ngā kaipūtaiao te whakaaro nā ngā mahi o te tangata e whakatere ana tēnei wā whakamahana, arā, te climate change. Inā noa nei, kei te āhua pukuriri a Tāwhirimātea – te atua o ngā mea huarere – me te maha, te kaha kino hoki o ngā āwhā e tau nei ki ngā pito o te ao.
E ai ki ngā kaiwhakarite, a Mike Smith rāua ko Hinekaa Mako, ko te hua o tēnei kiriata, He Ao Wera, hei whai mōhio ngā iwi me ngā hapū huri noa i a Aotearoa mō tēnei take tino nui. Hei arahi hoki i ngā rōpū me pēhea kia whakarite i o rātou hapū/whānau/iwi mō ngā hua o te ‘climate change’. Ko Hinekaa te kaikawe kōrero mō tēnei kiriata. Nāna i tuku atu ngā kōrero katoa i roto i te reo Māori, hāunga i ētahi o ngā kōrero patapātai o ētahi o ngā kaipūtaiao.
I roto i te kiriata, ka haere ia ki ngā pitopito o Aotearoa hei whakaatu i ngā mahi o ētahi hapū hei whakarite i tā rātou haukāinga mō tēnei Whakamahana. He take nui mō Ngāi Māori mēnā ka whakamahana te moana, arā, ka tere whakarewa ngā awa kōpaka, i te mea ko te nuinga o ngā haukāinga e tau tata nei ki te tai, ki ngā awa hoki. E kī ana te whakataukī: “Ko te wai te oranga o te tangata”.
Ka rongo tātou mai i ngā tangata whenua o ētahi o ngā haukāinga huri noa i te motu, me pēhea o rātou raruraru, me ngā mahi kua whakarite ētahi rohe hei whakarite mō ngā raruraru ka tae mai nā Te Whakamahana o te Ao. Ko ētahi mahi i roto i tēnei kiriata, he hīkoi atu ki Bridge Pā i te Matau a Māui, ki Parihaka, ki Te Hokianga, ki Te Taitokerau hoki. Ka whakaako hoki mai rātou i ngā raru ka pā i o tātou whanaunga i ngā motu o Te Moana Nui a Kiwa.
E kī ana ngā kaipūtaiao huarere, ka whakamahana te ao, ā, nā tēnei ka waikawā ngā moana. Nā te kawanga i tino raru mō ngā mātaitai pērā ki te kūtai. Arā, ko te hua o tēnei kiriata hei whakaatu ki ngā whānau, hapū, iwi Māori katoa kia whakarite ai o rātou hau kāinga mō tēnei take. He māmā te rere o ngā kōrero hei whakamārama i ngā take o te climate change mō tātou i Aotearoa. Ki ahau nei, he tino pai ki te mātakitaki, he rawe hoki te waiata pātōtō (rap song) i te mutunga.
He Ao Wera
Kaiwhakarite: Mike Smith rāua ko Hinekaa Mako