Ia tau ka whakatau a VUWSA me Ngai Tauira i ngaa akonga hou me ngaa akonga o mua ki Te Waananga o Wikitoria. Ko teenei whakataunga e moohiotia whaanuitia ana ko te ‘Student Orientation’.
Hei whakakapi i teenei wiki whakatau, ka whakarite a VUWSA me Ngai Tauira i teetahi haakari nui e kiia ana ko te “Hang-Over Hangi”. Ka whakahaeretia teenei kaupapa i runga anoo i te tautoko o Te Herenga Waka Marae.
He waa teenei moo te noho tahi, te koorero tahi me te kai tahi! Rima taara noa iho te utu moo te haangi, aa, e tuuwhera ana teenei kaupapa ki ngaa taangata katoa, ahakoa ko wai, ahakoa noo whea, ahakoa pakeke, ahakoa tamaiti.
Kaaore e aahei ana ki te inu waipiro ki teenei o ngaa kaupapa. He roopuu anoo ka tae atu hei whakangaahau, hei whakakoakoa i te tini me te mano. I ngaa tau o mua, ko eenei ngaa roopuu i tuu i runga i te aataamira – The Phoenix Foundation, Nga Tama Kino, Alabaster Theatre, Trinity Roots, Farmer Pimp me The Seven Suns. Hei te tau e tuu mai nei, ka karangahia ngaa roopuu rongonui o Te Whanganui-aa-Tara me ngaa roopuu kapa haka ki te whakangaahau i a taatou.
Kia moohio mai koe ki hea tuu ai teenei kaupapa aa teeraa tau, tuhia ki too raataka!
Kei Kelburn Parade te marae o Te Herenga Waka – he pai noa iho te haere atu ki reira koorerorero ai, aa, he reka hoki ngaa kai o te raanui! Nau mai, haere mai, nau mai hoki mai ki te ‘Hangover Haangi’
(Naa Dusty McLoughlin, naa Moana Andrew i whakamaaori)
Panui: I ngaa koorero e whai ake nei ka hurihia matou i ngã tohutoo ki ngaa tohu oro e rua.
Notice: In all articles we have changed the macron into double vowels.