Kaatahi anoo au ka rongo i teetahi ripene o te wahanga i riro maa te roopu reggae a `1814’, i teetahi konohete i Poneke, engari inaianei, naa te aata whakarongo ki oo raatou koorero he nui ake tooku miiharo. He reo anoo too ia mema o te roopu. Kaore e taea i teenei waa te whiriwhiri ko teehea te mea koi rawa ki te whakahuaki whakaaro, me kii tonu he pai katoa ngaa koorero kua raarangitia e ia tangata. Ko nga waiata e tino whakaatu ana i teenei autaia, ko `Let My People Go’, me `Whakahonohono Mai’, aa, he ngaawari noa iho te kite kua paamamae raatou i ngaa take kei te ngaukino i te iwi Maaori. Ko te tohutohu matua, kia mau tonu te iwi ki oo taatou Maaoritanga kia kore ai e taka ki te hee.
Ahakoa he maha ngaa taangata e whai ana i te ao puuoro hei oranga moo raatou, he ruarua noa iho ka eke ki te taumata e wawatatia. Teeraa te koohimuhimu mai i te hunga e maatau ana, Ko `1814’ teetahi roopu ka kitea i ngaa tau kei te heke mai. Ko te tumanako he tika taua koorero kia rongo ai te tini me te mano ki ngaa raarangi kupu kua hangaia e raatou hei ngahau, otiraa hei whakaohooho hoki i te iwi. Naa reira kia tuu too noho, aa, kia maumahara hoki koe ki te ingoa o te roopu nei noo Te Tai Tokerau, te roopu 1814.
I roto i te tekau kua eke te koopae nei ki te whitu.
7/10
Tirohia te paetukutuku www.1814.co.nz